ܥܕܬܐ ܕܡܪܝ ܡܝܟܐܝܠ ܡܘ̣ܠܟܢܐ ܗ̱ܘ ܕܣܘܪ̈ܝܝܐ ܩܕ̈ܡܐ ܬܪ̈ܝܨܝ ܫܘ̣ܒܚܐ. ܡܬܩܪܝܐ ܐܦ ܕܝܪܐ ܕܒܘ̣ܪܓܐ. ܥܠܬܐ ܕܡܬܩܪܝܐ ܒܗܢܐ ܫܡܐ ܗܢܐ ܗ̱ܘ: ܩܕܡ ܒܢܝܢܐ ܕܥܕܬܐ ܫܟܝ̣ܚ ܗ̱ܘܐ ܒܘ̣ܪܓܐ ܚܕ ܡܛܠ ܥܡܘ̣ܪܝܐ ܕܕܝܪ̈ܝܐ ܘܥ݀ܡܪ ܗ̱ܘܐ ܒܗ ܗܝܕܝܟ ܩܕܝܫܐ ܡܪܝ ܝܘܣܦ ܕܐܝܬܘܗܝ ܗ̱ܘܐ ܡܠܦܢܐ ܕܡܪܝ ܡܝ̣ܟܐܝܠ. ܒܘ̣ܪܓܐ ܗܢܐ ܥܕܟܝܠ ܩܲܝ݀ܡ ܒܕܘܟܬܗ ܠܦܘ̣ܬ ܡܐ ܕܡ݂ܬܚܙܐ ܘܐܬܒܢܝ̣ ܠܥܠ ܡܢܗ ܡܢܳܪܬܐ ܕܢܩܘ̣ܫܐ.

 ܠܦܘ̣ܬ ܡܒ̈ܥܐ ܣܘ̣ܪ̈ܝܝܐ ܕܡܚ̇ܘܝܢ܆ ܥܕܬܐ ܕܡܪܝ ܡܝܟܐܝܠ ܐܬܒܢܝܬ݀ ܫܢܬ ܩܦܗ ـ 185ܡ̄ ܘܥܕܬܐ ܗܝ̣ ܩܕܡܝܬܐ ܕܐܬܒܢܝܬ݀ ܒܡܪܕܝܢ. ܡܒ̈ܥܐ ܣܘܪ̈ܝܝܐ ܕܐܬܕܟܪܢܢ܆ ܐܝܬܝܗܘܢ ܬܪܝܢ ܟܬܒ̈ܐ ܕܐܬܟܬܒܘ ܒܕܪܐ ܚܡܫܥܣܝܪܝܐ ܕܟܬܝܒܐ ܒܗܘܢ ܬܫܥܝ̣ܬܐ ܕܡܪܝ ܡܝܟܐܝܠ ܘܣܝ̣ܪܐܣ ܚܬܗ. ܘܡܢܳܚܐ ܕܘܠܒܐܢܝ ܣܪܛ ܬܫܥܝ̈ܬܐ ܗ̇ܠܝܢ ܡ̣ܢ ܬܪܝܢ ܟܬܒ̈ܐ ܕܐܬܟܬܒܘ ܒܕܪܐ ܚܡܫܥܣܝܪܝܐ ܠܟܬܒܐ ܚܕ ܚܕܬܐ. ܕܘܠܒܐܢܝ̣ ܟܕ ܡܫܪܪ ܠܣܝܩܘܡܐ ܗܢܐ ܡ̣ܢ ܓܒܐ ܚܕ ܘܡ̣ܢ ܓܒܐ ܐ̱ܚܪܢܐ ܦܬܚ ܐܳܬܘ̈ܳܬܐ ܕܫܘ̣ܐܳܠܐ ܠܩܪ̈ܘ̣ܝܐ ܡܛܠ ܣܝ̣ܩܘ̣ܡܐ. ܐܬܘ̈ܬܐ ܗ̇ܠܝܢ ܫܪܝܪܐܝܬ ܠܡܺܐܡܪ܆ ܫܓܫܘ ܠܗܘܢܐ ܕܝܠܝ ܬܘܒ. ܐܠܐ ܩܕܡܝܬ ܙ݀ܕܩ ܕܢܒ݁ܕܩ ܠܨܒܘ̣ܬܐ ܐܟܡܐ ܕܐܝܬܝܗ̇.

   ܐ- ܟܬܒܐ ܕܬܫܥܝ̈ܬܐ ܕܩܕ̈ܝܫܐ ܘܦܢܩܝ̣ܬܐ ܕܥܕܬܐ ܕܡܪܬܝ ܫܡܘ̣ܢܝ ܘܕܡܪܝ ܡܝ̣ܟܐܝܠ ܕܒܡܪܕܐ ܡܚ̇ܘܝܢ ܕܐܬܥܢ̣ܕܘ ܡܪܝ ܡܝ̣ܟܐܝܠ ܘܣܝ̣ܪܐܣ ܚܬܗ ܫܢܬ ܬܨ̇ܘ ـ 496 ܝܘܢܝܬܐ. ܫܢ̱ܬܐ ܝܘܢܝܬܐ ܩܕܝ̣ܡܳܐ܆ ܫܝܐ ـ 311 ܫܢܝ̈ܢ ܠܫܢ̱ܬܐ ܡܫܝ̣ܚܳܝܬܐ. ܐܢ ܐܦ̣ܩܢܢ ܫܝܐ ـ 311 ܫܢܝ̈ܢ ܡ̣ܢ ܬܨ̇ܘ ـ 496 ܦ݀ܐܫ ܒܐܝܕ̈ܝܢ ܩܦܗ ـ 185 ܫܢܝ̈ܢ. ܠܦܘ̣ܬ ܣܝ̣ܩܘ̣ܡܐ ܗܢܐ ܐ݀ܡܪܝ̣ܢܢ ܥܕܬܐ ܕܡܪܝ ܡܝ̣ܟܐܝܠ ܐܬܒܢܝܬ݀ ܫܢܬ ܩܦܗ ـ 185ܡ̄. ܒܘ̣ܪܓܐ ܕܝܢ ܠܦܘ̣ܬ ܡܐ ܕܡ݂ܬܚܙܐ ܩܕܝܡ ܠܒܢܝܢܐ ܕܥܕܬܐ.

   ܒ- ܠܦܘ̣ܬ ܬܪܝܢ ܟܬܒ̈ܐ ܕܬܫܥܝ̈ܬܐ ܕܩܕ̈ܝܫܐ ܕܕܟܝܪܝܢ܆ ܡܪܝ ܝܘܣܦ، ܡܪܝ ܡܝ̣ܟܐܝܠ ܘܡܪܬܝ ܣܝ̣ܪܐܣ ܥܢ݂ܕܘ ܒܬܪ ܚܕܕ̈ܐ ܫܢ̱ܬܐ ܒܬܪ ܐ̱ܚܪܬܐ. ܒܫܘ̣ܢܝܐ ܕܡܪܬܝ ܣܝ̣ܪܐܣ ܟܬܒܐ ܡܚ̇ܘܐ ܕܗܟܢܐ ܓܕܫ܆ ܗܓܡܘܢܐ ܕܡܕܝܢܬ ܟܦܪܬܘ̣ܬܐ (ܟܦܪܬܘܬܐ ܡܠܬܐ ܗܝ̣ ܣܘ̣ܪܝܝܬܐ ܘܝܗܒܐ ܣܘ̣ܟܳܠ ܩܪܝܬܐ ܕܬܘ̣ܬܐ. ܝܘܡܢ ܩܪܝܬܐ ܙܥܘ̣ܪܬܐ ܕܐܣܝ̣ܪܐ ܒܩܤܛܪܐ ܕܩܶܙܶܠܬܶܦܷ̇ܐ) ܐܝܬܘܗܝ ܗ̱ܘܐ ܝܘܢܢ. ܐܝ̣ܬ ܗ̱ܘܐ ܠܗ ܒܪܐ ܕܐܬܟܪܗ ܒܟܘ̣ܪܗܢܐ ܢܦܫܢܝܐ. ܣܡܣܡܗ ܠܘܬ ܐܣܘ̈ܬܐ ܡܬܚܐ ܕܙܒܢܐ ܒܪܡ ܠܐ ܐܬܐܣܝ̣. ܐܫ̣ܬܡܥ ܠܗ ܥܠ ܩܕܝܫܘ̣ܬܐ ܕܡܪܝ ܡܝ̣ܟܐܝܠ. ܐܰܝܬܝܗ ܠܘܬܗ ܐܝܟܢܐ ܕܢܨܠܐ ܥܠܘܗܝ. ܒܪܡ ܟܕ ܐܬ݂ܐ ܠܘܬܗ ܐܫ̣ܟܚ ܕܗܐ ܚܳܬܗ ܣܝ̣ܪܐܣ ܐܫܬܢܝܬ݀. ܐܬܛܝܒ ܒܫܘ̣ܢܝܗ̇. ܒܬܪܟܢ ܒܥ݂ܐ ܡ̣ܢ ܡܪܝ ܡܝ̣ܟܐܝܠ ܕܢܨܠܐ ܡܛܠ ܒܪܗ ܟܪܝ̣ܗܐ. ܡܪܝ ܡܝ̣ܟܐܝܠ ܟܕ ܨܰܠܝ̣ ܥܠܘܗܝ ܐܬܐܣܝ̣ ܛܠܝܐ ܡ̣ܢ ܟܘܪܗܢܗ. ܗܓܡܘܢܐ ܕܝܢ ܡܛܠ ܥܘ̣ܗܕܢ ܬܕܡܘܪܬܐ ܗ̇ܕܐ ܕܚ݂ܙܐ܆ ܒܢ݂ܐ ܩܘܒܬܐ ܡܪܰܒܥܬܐ ܥܠ ܩܒܪܐ ܕܡܪܬܝ ܣܝ̣ܪܐܣ. ܐܫܬܡܥ ܛܶܒܐ ܕܬܕܡܘܪܬܐ ܕܗܘܬ ܒܟܠ ܐܬܪ ܘܦܢ̈ܝܢ. ܘܫܪܝܘ ܒܢܝ̈ܢܫܐ ܡܝܬܝܢ ܟܪ̈ܝܼܗܝܗܘܢ ܠܘܬ ܡܪܝ ܡܝ̣ܟܐܝܠ ܘܩ݀ܢܝܢ ܚܘ̣ܠܡܢܐ ܒܝܕ ܥܘܕܪܢܐ ܕܨܠܘ̈ܬܗ.

   ܓ- ܡܠܟܐ ܩܘ̣ܒܐܕ (ܩܘܕ) ܕܡܫܠܛ ܒܐܬܪܐ܆ ܐܝ̣ܬ ܗ̱ܘܐ ܠܗ ܒܪܐ ܟܪܝܗܐ. ܗܓܡܘ̣ܢܐ ܕܡܕܝܢܬ ܟܦܪܬܘ̣ܬܐ ܫܘܕܥܗ ܥܠ ܬܕܡܪ̈ܬܐ ܕܗܘ̈ܝܢ ܒܝܕܗܘܢ ܕܩܕ̈ܝܫܐ. ܘܐܝܬܝ ܡܠܟܐ ܠܒܪܐ ܕܝܠܗ ܠܘܬ ܩܒܪܐ ܕܩܕܝܫܐ ܡܪܝ ܡܝ̣ܟܐܝܠ. ܥܡ ܣܥܘܪܘ̣ܬܐ ܕܥܒ݂ܕܘ ܐܬܐܣܝ ܒܪܐ ܕܡܠܟܐ ܩܘ̣ܒܐܕ. ܡܠܟܐ ܛ݀ܒ ܐܬܦܨܚ ܡ̣ܢ ܬܕܡܘܪܬܐ ܕܚܙ݂ܐ ܒܥܝ̈ܢܘܗܝ. ܡܚܕܐ ܐܝܬܝ ܥܣܪܝܢ ܐܘ̣ܡ̈ܢܐ ܘܒܢ݂ܐ ܕܝܪܐ ܛܒ ܬܡܝ̣ܗܬܐ ܥܠ ܩܒܪܐ ܕܡܪܝ ܡܝ̣ܟܐܝܠ ܘܡܪܬܝ ܣܝ̣ܪܐܣ. ܘܙܪ݂ܥ ܟܪ̈ܡܐ ܘܓܢ̈ܬܐ ܒܓܒܐ ܓܪܒܝܝܐ ܕܕܝܪܐ. ܘܒܢ݂ܐ ܕܝܢ ܪܰܚܝܳܐ ܚܕܐ ܘܐܬ݂ܟܢܫ ܠܕܝܪܐ ܗܕܐ ܐܪܒܥܝ̣ܢ ܕܝܪ̈ܝܐ.

   ܫܘܼ̈ܐܠܐ ܕܫ݀ܓܫܝܢ ܠܗܘܢܐ ܒܬܫܥܝ̣ܬܐ ܗܕܐ ܗܠܝܢ ܐܢܘܢ:

ܐ- ܐܰܪܰܐ ܫܟܝ̣ܚ ܗ̱ܘܐ ܡܠܟܐ ܕܫܡܗ ܩܘ̣ܒܐܕ ܫܢܬ ܩܦܗ ـ 185ܡ̄؟

ܒ- ܐܪܐ ܫܟܝ̣ܚ ܗ̱ܘܐ ܒܗ̇ ܒܫܢ̱ܬܐ ܕܕܟܝܪܐ ܐܪܒܥܝ̣ܢ ܕܝܪ̈ܝܐ؟

ܓ- ܐܪܐ ܫܟܝ̣ܚ ܗ̱ܘܐ ܗܓܡܘܢܐ ܕܫܡܗ ܝܘܢܢ ܒܡܕܝܢܬ ܟܦܪܬܘ̣ܬܐ؟ (ܠܦܘ̣ܬ ܬܫܥܝܬܐ܆ ܗܓܡܘ̣ܢܐ ܝܘܢܢ ܐܬܛܝܒ ܒܫܟܝ̣ܢܬܐ ܕܩܕܝܫܐ ܡܪܝ ܡܝ̣ܟܐܝܠ ܘܥܡܗ ܟܗ̈ܢܐ ܘܡܫܡ̈ܫܢܐ ܣܓܝ̈ܐܐ ܘܫܒܥܐ ܝܘ̈ܡܝܢ ܩܘܝ̣ܘ ܬܡܢ ܟܕ ܡܨܠܝܢ ܥܠ ܫܟܝ̣ܢܬܐ ܕܩܕܝܫܐ. ܘܥܦܝܘ̣ܗܝ ܒܓܒܐ ܡܕܢܚܳܝܳܐ ܕܡܪܬܝ ܣܝܪܐܣ.)

   ܒܚܢܬ݁ ܥܠ ܫܘ̣ܐܠܐ ܩܕܡܝܐ ܘܬܪܝܢܐ ܘܡܛܝܬ݁ ܠܢܝ̣ܫܐ ܕܒܘ̣ܚܢܐ. ܫܢܬ ܩܦܗ ـ 185ܡ̄ ܠܐ ܫܟܝ̣ܚ ܗ̱ܘܐ ܒܐܬܪܐ ܡܠܟܐ ܒܫܡܐ ܕܩܘ̣ܒܰܐܕ. ܡܛܠ ܕܦܢܝ̣ܬܐ ܟܠܗ̇ ܐܝܬܝܗ̇ ܗ̱ܘܬ ܬܚܝܬ ܫܘ̣ܠܛܢܘܬܐ ܕܡܠ̈ܟܐ ܐܰܒܓܰܪ̈ܝܐ ܣܘ̣ܪ̈ܝܝܐ. ܬܚܘ̣ܡܐ ܕܡܠܟܘܬܗܘܢ܆ ܡ̣ܢ ܓܒܐ ܕܡܕܢܚܐ ܒܒܝܠ، ܡ̣ܢ ܓܪܒܝܐ ܐܰܪܡܺܝܢܝܰܐ، ܘܡ̣ܢ ܝܕ ܡܕܒܪܢܘ̣ܬܐ ܛܒܬܐ ܕܡܠ̈ܟܐ ܐܒܓܪ̈ܝܐ ܥܡܐ ܐܪܡܢܝܐ ܐܚܒ ܐܢܘܢ ܘܝܗ݂ܒ ܫܡܐ ܕܡܠ̈ܟܐ ܐܒܓܪ̈ܝܐ ܠܡܠ̈ܟܐ ܕܝܠܗܘܢ.[1] ܡܠܟܐ ܕܕܟܝܪ ܩܘ̣ܒܐܕ، ܡܠܟܐ ܗ̱ܘ ܦܪܣܝܐ ܘܰܡܫܰܠܛ ܗ̱ܘܐ ܒܦܢܝ̣ܬܐ ܫܢܬ ܬܨ̇ܘ ـ 496 ܡ̄.[2]

   ܡܣܬܟܠܝ̣ܢܢ ܡ̣ܢ ܡܒ̈ܥܐ ܗܠܝܢ ܕܩܕ̈ܝܫܐ ܕܕܟܝܪܝܢ ܚ݀ܐܝܢ ܗ̱ܘܘ ܫܢܬ ܬܨ̇ܘ ـ 496 ܡ̄ ܘܠܲܘ ܝܰܘܢܝܬܐ. ܐܦܢ ܟܬܝ̣ܒܐ ܫܢ̱ܬܐ ܝܘܢܝܬܐ ܐܠܐ ܒܦܘܕܐ ܐܬܟܬܒܬ݀.

   ܦܘ̣ܢܳܝܐ ܕܫܘ̣ܐܠܐ ܬܪܝܢܐ ܕܝܢ܆ ܫܢܬ ܩܦܗ ـ 185ܡ̄ ܥܕܟܝܠ ܚܝ̈ܐ ܕܕܝܪܝܘܬܐ ܠܐ ܐܬܛܟܣܘ ܗ̱ܘܘ ܥܕܡܐ ܕܢܬܟܢܫ ܐܪܒܥܝܢ ܕܝܪ̈ܝܐ ܠܕܝܪܐ ܚܕܐ ܘܢܚܘܢ ܥܡ ܚܕܕ̈ܐ. ܛܘ̣ܟܣܐ ܕܕܝܪܝܘ̣ܬܐ ܘܥܡܘܪܝܐ ܕܕܝܪܐ ܫܪܝ̣ ܒܫܘ̣ܪܝܐ ܕܕܪܐ ܪܒܝ̣ܥܝܐ.

   ܦܘ̣ܢܝܐ ܕܫܘ̣ܐܠܐ ܬܠܝܬܝܐ܆ ܥܕܟܝ̣ܠ ܠܐ ܐܬܡܨܝ̣ܢܢ ܠܡܟܢܫܘ̣ ܡܒ̈ܥܐ ܕܡܚܘܝܢ ܐܝܟܢܝܘ̣ܬܐ ܕܡܕܝܢܬ ܟܦܪܬܘ̣ܬܐ ܒܕܪܐ ܬܪܝܢܐ. ܐܠܐ ܝ݀ܕܥܝ̣ܢܢ ܕܐܦܣܩܘܦܘ̣ܬܐ ܕܟܦܪܬܘ̣ܬܐ ܐܫܬܬܣܬ݀ ܒܐܚܪ̈ܝܬܗ ܕܕܪܐ ܪܒܝ̣ܥܝܐ ܘܫܢܬ ܬܪܙ ـ 607 ܡ̄ ܝܰܬܝ̣ܒ ܗ̱ܘܐ ܥܠ ܟܘܪܣܝܗ̇ ܚܣܝܐ ܕܫܡܗ ܒܣܝ̣ܠ.

   ܫܘ̣ܠܡܐ ܕܟܠ܆ ܐܟܡܐ ܕܐܩܪܚܢܢ ܡ̣ܢ ܠܥܠ ܣ݀ܪܘ̣ܛܐ ܕܣܪܛ ܬܫܥܝ̈ܬܐ ܕܩܕ̈ܝܫܐ ܐܘ̇ ܦܢܩܝ̈ܬܐ ܕܟܒܪ ܛܰܥܘ̇ܢܳܐܝ̣ܬ ܟܬ݂ܒ ܫܢ̱ܬܐ ܝܘܢܝܬܐ ܡ̣ܢ ܚܠܦ ܗ̇ܝ ܡܫܝ̣ܚܳܝܬܐ. ܡܛܠ ܕܣܘܓܐܐ ܕܟܬܘܼ̈ܒܐ ܣܘܪ̈ܝܝܐ ܠܫܢ̱ܬܐ ܝܘܢܝܬܐ ܡܬܚܫܚܝ̣ܢ ܒܟܬܝܼ̈ܒܬܗܘܢ. ܘܫܢ̱ܬܐ ܝܘܢܝܬܐ ܩܕܝܡܐ ܫܝܐ ـ 311 ܫܢ̈ܝܢ ܠܗ̇ܝ ܡܫܝ̣ܚܝܬܐ. ܡܛܠ ܗܕܐ ܡܫܟܚܝ̣ܢܢ ܕܢ݀ܐܡܪ ܥܕܬܐ ܕܡܪܝ ܡܝ̣ܟܐܝܠ ܐܬܒܢܝܬ݀ ܫܢܬ ܬܨ̇ܘ ـ 496 ܡ̄. ܘܒܘ̣ܪܓܐ ܕܐܬܒܢܝܬ݀ ܥܠܘܗܝ ܡܢܳܪܬܐ ܕܢܩܘ̣ܫܐ ܕܝܢ ܡܬܚܙܐ ܕܝܬܝܪ ܥܬܝ̣ܩ ܡ̣ܢ ܒܢܝ݀ܢܐ ܕܥܕܬܐ.

   ܘܠܦܘܬ ܝܕܥܬܐ ܕܝܗ̱ܒܢܢ ܡ̣ܢ ܠܥܠ ܥܕܬܐ ܕܡܪܝ ܡܝ̣ܟܐܝܠ ܐܬܒܢܝܬ݀ ܚܕܳܪܝ ܐܚܪ̈ܝܬܗ ܕܕܪܐ ܚܡܝ̣ܫܝܐ. ܘܐܬܚܪܒܬ݀ ܩܨܬ ܥܠ̈ܠܬܐ ܕܠܐ ܝ̣ܕܝܼ̈ܥܢ ܠܢ ܘܐܬܚܕܬܬ݀ ܡ̣ܢ ܕܪܝܫ ܒܡܨܥܝ̈ܬܗ ܕܕܪܐ ܬܪܥܣܝܪܝܐ ܐܩܟܗ ـ ܐܩܣܗ 1165ـ 1125 ܡ̄ ܒܝܕ ܚܣܝܐ ܝܘܚܢܢ ܪܒܝ̣ܥܝܐ ܕܡܪܕܐ.

   ܘܠܦܘ̣ܬ ܟܬܝ̈ܒܬܐ ܣܘܪ̈ܝܝܬܐ ܕܫܟܝܼ̈ܚܢ ܥܠ ܟܐܦ̈ܐ ܕܓܢܝ̣ܙܐ ܬܝܡܢܝܐ ܕܥܕܬܐ ܐܬܚܕܬܬ݀ ܒܝܕ ܦܛܪܝܪܟܐ ܓܘܪܓܝܣ ܬܪܝܢܐ ܡܘܨܠܝܐ ܒܝܬ ܫܢܬ ܐܣ̇ܦܙ ـ ܐܥ̇ܚ 1708 ـ 1687 ܡ̄.

ܐܩܦܬܐ ܐ̱ܚܪܬܐ ܠܒܢܝ݀ܢܐ ܕܥܕܬܐ:

   ܡܛܠ ܐܩܦܬܐ ܐ̱ܚܪܬܐ ܠܒܢܝܢܐ ܕܥܕܬܐ܆ ܟܬܝܒ ܒܘܪܩܐ ܐ̱ܚܪܝܬܐ ܕܐܘܢܓܠܝܘܢ ܕܥܕܬܐ ܕܡܪܝ ܡܝ̣ܟܐܝܠ ܝ̣ܕܥܬܐ ܛܒ ܫܦܝ̣ܪܬܐ܆ «ܟܬܘܫ ܒܪ̱ܬ ܡܩܕܫܝܐ ܔܪܔܝܣ ܚܶܠܘܰܔܝ̣ ܫܰܟܢܬ݀ ܐܪܒܥܣܪ̈ܐ ܐܠܦ̈ܐ ܙܘ̈ܙܐ ܠܥܕܬܐ ܕܡܪܝ ܡܝ̣ܟܐܝܠ ܘܒܝܕܗܘܢ ܐܬܒܢܝ̣ ܬܠܬܐ ܓܒ̈ܐ ܐ̱ܚܪ̈ܢܐ ܐܝܟ ܐܩܦܬܐ ܠܥܕܬܐ ܡ̣ܢ ܓܒܐ ܡܥܪܒܝܐ. ܘܒܢܬ݀ ܐܦ ܥܠ ܗܠܝܢ ܬܠܬܐ ܓܒ̈ܐ ܚܕ̈ܬܐ ܕܘܟܬܐ ܚܕܐ ܡܛܠ ܢܫ̈ܐ ܕܡܬܩܪܝܐ ܙܺܝܰܐܚ ܒܠܫܢܐ ܥܪܒܝܐ. ܐܘ̣ܡܢܐ ܕܬܪ̈ܝܗܘܢ ܒܢܝ̈ܢܐ ܗܠܝܢ܆ ܒܥܠܐ ܕܟܬܘܫ ܡܩܕܫܝܐ ܓܶܢܔܳܐ ܒܪ ܡܩܕܫܝܐ ܡܠܟܐ ܟܕܪܫܐܗ ܐܝ̣ܬܘܗܝ. ܘܥܡ ܗܠܝܢ ܐܩܦ̈ܬܐ܆ ܘܟܝܼ̈ܠܐ ܕܥܕܬܐ ܟܢܫܘ ܟܡܳܝܘܬܐ ܕܙܘܼ̈ܙܐ ܡ̣ܢ ܥܡܐ ܕܡܪܕܝܢ ܘܕܨܘܪܐ ܐܝܟ ܡܐܐ ܘܫܒܥܝ̣ܢ ܠܝ̣ܪ̈ܬܐ ܕܗܒܢ̈ܝܬܐ ܘܒܢ݂ܘ ܒܗܘܢ ܬܪܥܐ ܒܪܝܐ ܕܕܪܬܐ ܕܥܕܬܐ ܘܫܘ̣ܪܐ ܥܠܝܐ ܕܚܕܪ ܠܗ̇ ܠܕܪܬܐ ܡ̣ܢ ܓܒܐ ܡܥܪܒܝܐ ܘܩܠܝܬܐ ܛܒ ܫܦܝܪܬܐ ܡ̣ܢ ܓܒܐ ܓܪܒܝܝܐ ܘܬܚܘ̣ܬܝܗ̇ ܐܦ ܩܠܝܬܐ ܙܥܘܪܬܐ». ܚܘ̣ܕ̈ܬܐ ܗܠܝܢ ܝܗ݂ܒܘ ܫܘ̣ܦܪܐ ܫܦܝ̣ܪܐ ܠܥܕܬܐ.

ܩܕܘܫܩܘܕ̈ܫܝܢ:

   ܩܕܘܫܩܘܕ̈ܫܝܢ ܕܒܓܘ ܡܕܒܚܐ ܡܨܥܝܐ ܒܢܝ݀ܢܐ ܗ̱ܘ ܚܕܬܐ ܘܥܒܝ̣ܕ ܡ̣ܢ ܟܐܦ̈ܐ ܦܣܝܼ̈ܠܬܐ ܘܰܡܨܰܒܰܬ ܒܨܒ̈ܬܐ ܘܰܓܠ̈ܳܦܶܐ ܕܙܢܝ̈ܢ ܙܢܝ̈ܢ. ܘܟܬܝ̣ܒ ܥܠܘܗܝ ܣܝܩܘ̣ܡܐ ܕܝܠܗ ܒܐܬܘ̈ܬܐ ܣܘ̣ܪ̈ܝܝܬܐ܆ «ܐܬܒܢܝ̣ ܩܕܘ̣ܫܩܘܕ̈ܫܝܢ ܗܢܐ ܒܝܘ̈ܡܝ ܦܛ̄ܪ ܐܦܪܝܡ ܩܕܡܝܐ ܘܚܣܝܐ ܚܢܢܐ ܕܘܠܒܐܢܝ ܕܡܶܪܕܳܐ، ܒܝܨܝܦܘ̣ܬܗ ܕܥܡܐ ܣܘ̣ܪܝܝܐ ܐܪܬܕܘܟܣܝܐ ܕܡܪܕܐ ܘܕܝ̣ܠܢܐܝ̣ܬ ܕܡܫܡܫܢܐ ܐܒܠܚܕ ܟܘ̣ܡܳܪܶܐ (ܛܰܗܝ̣ܢܔܝܐܳܘܓ̣ܠܘ) ܐܒܪܗܝ̣ܡ ܫܰܚܛܶܐ ܘܡܪܝܡ ܫܗܪܝ̣ܣܬܢ». ܐܘ̣ܡ̈ܢܐ ܕܗܢܐ eser ܒܢܝܢܐ ܫܒܝ̣ܚܐ ܘܬܗܝ̣ܪܐ܆ ܐܘ̣ܡ̈ܢܐ ܣܘ̣ܪ̈ܝܝܐ ܐܢܘܢ ܕܡ̣ܢ ܩܣܛܪܐ ܡܕܝܕ ܥܝ̣ܣܐ ܫܪܪܘ ܘܚܒܪ̈ܘܗܝ ܐ̱ܚܪ̈ܢܐ. ܛܘ̣ܦܣܐ ܕܗܢܐ ܒܢܝܢܐ ܫܟܝ̣ܚ ܒܥܕ̈ܬܐ ܐ̱ܚܪ̈ܢܝܬܐ.

ܒܝܬ ܩܕ̈ܝܫܐ:

   ܫܟܝ̣ܚ ܒܓܪܒܝ ܡܕܢܚܐ ܕܥܕܬܐ ܕܡܪܝ ܡܝ̣ܟܐܝܠ ܒܝܬܐ ܕܡܬܩܪܐ ܒܝܬ ܩܕܝ̈ܫܐ. ܐܝ̣ܬ ܒܗ ܬܠܬܐ ܩܒܪ̈ܐ. ܩܒܪܐ ܕܡܪܝ ܝܘܣܦ، ܕܡܪܝ ܡܝܟܐܝܠ، ܘܕܡܪܬܝ ܣܝܪܐܣ. ܐܝܬ ܥܠ ܦܘ̣ܡ ܩܒܪ̈ܐ ܟܐܦ̈ܐ ܦܣܝܼ̈ܠܬܐ ܪܘܪ̈ܒܬܐ ܘܟܬܝ̣ܒ ܥܠܝܗܝܢ ܟܬܝ̣ܒܬܐ ܣܘܪܝܝܬܐ ܐܤܛܪܢܓܠܝܬܐ. ܟܬܝܒܬܐ ܕܥܠ ܩܒܪ̈ܐ ܐܬܠܚܝܬ݀ ܡ̣ܢ ܝܕ ܪܟܝ̣ܟܘ̣ܬ ܟܐܦ̈ܐ. ܩܒܪܐ ܕܓܪܒܝܐ ܠܚܘ̣ܕ ܡܬܩܪܝܐ ܩܠܝܠ ܡ̣ܢ ܟܬܝ̣ܒܬܗ ܘܐܣܬܟܠܢܢ ܕܐܝ̣ܬܘܗܝ ܕܡܪܬܝ ܣܝ̣ܪܐܣ.

ܒܘܪܓܐ ܘܡܢܪܬܐ ܕܢܩܘܫܐ:

   ܒܘܪܓܐ ܕܐܬܕܟܪܢܢ ܡ̣ܢ ܩܕܝܡ ܫܟܝ̣ܚ ܩܕܡ ܡܥܠܬܐ ܕܬܪܥܐ ܕܥܕܬܐ ܘܕܒܝ̣ܩ ܠܒܝܬܐ ܕܒܝܬ ܩܕ̈ܝܫܐ ܘܐܝ̣ܬ ܥܠܘܗܝ ܡܢܳܪܬܐ ܕܢܩܘ̣ܫܐ. ܠܦܘ̣ܬ ܬܫܥܝܬܐ ܕܩܕ̈ܝܫܐ ܕܕܟܝ̣ܪܝܢ ܡܪܝ ܝܘܣܦ ܒܗܢܐ ܒܘܪܓܐ ܚ݀ܝܐ ܗ̱ܘܐ. ܡܛܠ ܕܓܘܕܐ ܚܕܐ ܡ̣ܢ ܕܕܝܪ̈ܝܐ ܒܒܘܪ̈ܓܐ ܕܕܐܝܟ ܗܠܝܢ ܚ݀ܐܝܢ ܗ̱ܘܘ. ܐܝܟ ܐܝܬܐ ܠܡܺܐܡܪ: ܡܪܝ ܫܡܥܘܢ ܕܐܤܛܘܢܗ܆ ܒܕܝܪܐ ܕܒܢ݂ܐ ܠܗ ܒܪܚܝ̣ܩܘ̣ܬܐ ܕܬܠܬܝܢ ܟܝܠܘܡܬܪ̈ܐ ܕܡ̣ܢ ܚܠܒ ܐܝܬ ܗ̱ܘܐ ܠܗ ܐܤܛܘܢܐ (ܐܤܛܘܢܐ ܗ̇ܢܘ ܒܘ̣ܪܓܐ) ܕܪܘܡܗ ܬܪܥܣܪ ܡܬܪ̈ܐ ܘܦܬܝܗ ܬܠܬܐ ܡܬܪ̈ܐ ܕܚ݀ܝܐ ܗ̱ܘܐ ܒܗ ܫܢܬ ܫܨ̇ܒ ܡ̄. ܘܒܢ݂ܐ ܠܗ ܐܤܛܘܢܐ ܐ̱ܚܪܢܐ ܒܛܘ̣ܪܐ ܕܐܝܙܠܐ ܠܥܠ ܡ̣ܢ ܢܗܪܐ ܡܳܫܟ (ܡܝ̈ܐ ܚܘܪ̈ܐ) ܕܦ݀ܐܫ ܒܝܬ ܢܨܝܒܝܢ ܘܠܡܕܝܕ. ܐܤܛܘܢܐ ܕܕܟܝ̣ܪ ܥܕܟܝ̣ܠ ܣܚܝܼ̈ܦܬܗ ܩܝ̈ܡܢ ܘܡܬܚܙܐ ܡ̣ܢ ܪܘ̣ܚܩܐ. ܡܪܝ ܫܡܥܘܢ ܕܐܤܛܘܢܗ ܚܝܳܐ ܒܒܘ̣ܪ̈ܓܐ ܕܐܝܟ ܗܠܝܢ ܒܕܘ̣ܟܝ̈ܬܐ ܡܫܚ̈ܠܦܬܐ. ܡܪܝ ܕܢܝܐܝܠ ܐܤܛܘ̣ܢܝܐ ܕܝܢ ܚ݀ܝܐ ܗ̱ܘܐ ܒܒܘ̣ܪ̈ܓܐ ܐܘ̇ ܐܤܛܘ̈ܢܐ ܕܕܐܝܟ ܗܠܝܢ.

   ܐܝ̣ܬ ܟܬܝ̣ܒܬܐ ܣܘ̣ܪܝܝܬܐ ܕܕܡܝܐ ܠܐܤܛܪܢܓܠܝܐ ܒܓܒܐ ܡܥܪܒܝܐ ܕܒܘܪܓܐ ܕܡ̣ܢ ܕܪܐ ܬܫܝܥܝܐ ܘܡܬܩܪܝܐ ܛܒ ܩܪܝܚܐܝܬ. «ܒܫܡ ܐܠܗܐ ܐܬܒܢܝ̣ ܐܤܛܘܢܐ ܗܢܐ ܒܫܢܬ ܬܠܬܡܐܐ ܘܚܡܫܝ̣ܢ ܫܢ ـ 350 ܕܛܝܝ̈ܐ (ܬܬܩܟܐ ـ 921 ܡ̄) ܟܠ ܕܩ݀ܪܐ ܢܨܰܠܐ ܥܠ ܬܪܥܐ ܕܒܢܝܢܗ». ܡܣܬܒܪܐ ܓܝܪ ܕܐܬܒܢܝ̣ ܒܘ̣ܪܓܐ ܗܢܐ ܒܕܪܐ ܪܒܝ̣ܥܝܐ. ܕܫܬܐܣܬܐ ܕܝܠܗ ܡ݂ܬܚܙܝܐ ܕܛܒ ܥܬܝ̣ܩܐ. ܒܘܪܓܐ ܩܰܝ݀ܡ ܥܕܟܝ̣ܠ ܘܐܬܒܢܝ̣ ܥܠܘܗܝ ܫܢܬ ܐܦ̇ܦܗ ܡ̄ ܡܢܳܪܬܐ ܕܢܩܘ̣ܫܐ. ܐܝ̣ܬ ܟܬܝ̣ܒܬܐ ܓܪܫܘ̣ܢܝܬܐ ܒܦܠܓܘܬ ܡܢܪܬܐ: «ܐܘ̇ ܡܗܝܡܢܐ ܟܕ ܫ݀ܡܥ ܐܢ̱ܬ ܩܠ ܢܩܘ̣ܫܐ، ܬܐ ܦܨܝ̣ܚܐܝ̣ܬ ܠܥܕܬܐ ܕܐܠܗܐ. ܣܪܗܒ ܬܐ ܠܨܠܘ̣ܬܐ ܟܕ ܒ݀ܟܐ ܐܢ̱ܬ ܕܬܣܒ ܫܘ̣ܒܩܢܐ ܕܚܛܗ̈ܐ ܡ̣ܢ ܦܪܘ̇ܩܐ ܕܢܦܫ̈ܬܐ ܘܕܪ̈ܘܚܬܐ» ܫܢܬ ܐܦ̇ܦܗ ܡ̄ 1885.

ܐܝܟܢܝܘܬܐ ܕܥܕܬܐ ܕܡܪܝ ܡܝ̣ܟܐܝܠ ܒܙܒܢܢ ܗܢܐ:

   ܥܕܬܐ ܕܡܪܝ ܡܝ̣ܟܐܝܠ ܡ̣ܢ ܙܒܢܐ ܐܪܝܟܐ ܐܣܬܦܩܬ݀ ܗ̱ܘܬ ܡ̣ܢ ܥܡܘܪ̈ܝܗ̇ ܘܡܪ̈ܝܗ̇ ܘܢܦܠܬ݀ ܗ̱ܘܬ ܒܐܝܟܢܝܘܬܐ ܛܒ ܬܥܝ̣ܫܬܐ ܥܕܡܐ ܕܟܠܫܐ ܘܟܐܦ̈ܐ. ܕܫܘܪ̈ܝܗ̇ ܫܪܝ̣ܘ ܗ̱ܘܘ ܕܢ݀ܦܠܘܢ. ܘܒܝܬ ܩܒܘܪ̈ܝܗ̇ ܡܶܬܬܕܝ̣ܫܝܢ ܗ̱ܘܘ ܡ̣ܢ ܟܠܢܫ ܘܡܬܬܒܪ̈ܢ ܘܡܬܒܕܪ̈ܢ ܗ̱ܘ̈ܝ ܟܐܦ̈ܝܗ̇ ܥܠܗܕܐ ܫܲܪܝ̣ܢܢ ܚܢܢ ܐܝܟ ܡܗܝ̈ܡܢܐ ܕܡܪܕܐ ܡ̣ܢ ܫܢܬ ܐܨ̇ܦܘ ܡ̄ ܘܠܟ݂ܐ ܐܝܕܐ ܒܐܝܕܐ ܠܡܬܪܨܘ̣ ܒܗ̇ ܒܝܕ ܥܘܕܪ̈ܢܐ ܕܡܗܝ̈ܡܢܐ. ܫܢܬ ܐܨ̇ܨܙ ܡ̄ ܩܘ̣ܛܢܘ̣ܬܐ ܕܡܬܩܝܡܐ ܗ̱ܘܬ ܡ̣ܢ ܓܒܐ ܕܰܐܢܰܒ ܘܰܙܝܪܘ̣ܬܐ ܕܡܪܕܘܬܐ ܐܚܕܪܬ݀ ܠܒܝܬ ܩܒܘܪ̈ܐ ܕܕܟܝܪܝܢ܆ ܫܘܪܐ ܕܪܰܘܡܗ ܡܬܪܐ ܘܦܠܓ ܡ̣ܢ ܟܐܦ̈ܐ ܦܣܝܼ̈ܠܬܐ. ܡܫܟܚܝ̣ܢܢ ܕܢ݀ܐܡܪ ܕܗܢܐ ܥܘ̣ܕܪܢܐ ܩܕܡܝܐ ܗ̱ܘ ܕܐܬܥܒܕ ܒܡܠܟܘܬܐ ܬܘ̣ܪܟܝܬܐ ܠܥܕܬܐ ܡܫܝ̣ܚܝܬܐ. ܘܚܢܢ ܬܘܒ ܒܢ݂ܝܢܢ ܬܪܥܐ ܫܦܝܪܐ ܒܡܥܠܬܐ ܕܠܒܝܬ ܩܒܘܪ̈ܐ ܡ̣ܢ ܟܐܦ̈ܐ ܦܣܝܼ̈ܠܬܐ ܒܝܕ ܥܘܕܪܢܐ ܕܡܗܝ̈ܡܢܐ ܘܬܘ̣ܪܨܐ ܘܚܘܕܬܐ ܓܘܢܝܐ ܕܗܘ݂ܐ ܒܥܕܬܐ ܕܡܪܝ ܡܝܟܐܝܠ ܫܢܬ ܒܓ ܡ̄ ܡ̣ܢ ܝܩܪܬܐ ܣܘܪܝܝܬܐ ܕܒܝܬ ܛܰܚܝܢܔܺܝ ܕܥ݀ܡܪܝܢ ܗܫܐܝ̣ܬ ܒܐܤܛܢܒܘ̣ܠ. ܡܪܝܐ ܢܦܪܘ̣ܥ ܐܢܘܢ ܚܕ ܒܡܐܐ ܘܫܬܝܢ ܘܬܠܬܝܢ.

ܒܝܬ ܣܦܪܐ ܕܥܕܬܐ ܕܡܪܝ ܡܝܟܐܝܠ:

   ܠܦܘ̣ܬ ܒܘ̣ܚܢܐ ܕܥܒ݂ܕܢܢ ܐܬ݂ܦܬܚ ܗ̱ܘܐ ܒܝܬ ܣܦܪܐ ܪܘ̣ܫܡܝܐ ܒܥܕܬܐ ܕܐܪܒܥܝ̣ܢ ܣܗ̈ܕܐ ܕܒܓܘ ܡܪܕܐ ܡܕܝܢ̱ܬܐ ܫܢܬ ܐܥ̇ܨܛ ܡ̄ 1799 ܘܐܬ݂ܐܡܢ ܥܕܡܐ ܠܫܢܬ ܐܨ̇ܟܚ ܡ̄ ܘܡ̣ܢ ܥܠ̈ܠܬܐ ܕܠܐ ܝ̣ܕܝ̈ܥܢ ܠܢ ܐܫܬܢܝ̣ ܗ̱ܘܐ ܒܝܬ ܣܦܪܐ ܗܢܐ ܡܬܚܐ ܕܙܒܢܐ ܡ̣ܢ ܥܕܬܐ ܕܐܪܒܥܝ̣ܢ ܣܗ̈ܕܐ ܠܥܕܬܐ ܕܡܪܝ ܡܝܟܐܝܠ. ܒܝܬ ܣܦܪܐ ܗܢܐ ܐܬܦܬܚ ܒܣܝ̣ܩܘ̣ܡ ܝܗ ܚܙܝܪܢ ܐܨ̇ܝܛ ܡ̄ ܒܥܕܬܐ ܕܡܪܝ ܡܝܟܐܝܠ ܕܝܘܡܢ ܩܪܝܢܢ ܠܗ̇ ܥܕܬܐ ܥܠܝܬܐ܆ ܡܕܪܫܬܐ ܗܘܬ݀ ܗܝܕܝܟ. ܘܢܝ̣ܫܐ ܕܝܠܗ܆ ܡܠܦܢܘ̣ܬ ܟܠܗܘܢ ܒܢ̈ܝ ܐܬܪܐ ܕܠܐ ܦܘ̣ܪܫܢ ܓܢܣܐ ܘܕܬܘܕܝܬܐ ܒܝܘ̣ܠܦܢܐ، ܡܪܕܘܬܐ ܘܣܶܦܪܝܘ̣ܬܐ. ܗܪܓܐ ܕܬܘܕܝܬܐ ܕܬܪ̈ܝܨܝ ܫܘ̣ܒܚܐ ܠܚܘ̣ܕ ܠܝܠ̈ܘܦܐ ܕܢܩܝ̣ܦܝܢ ܠܗ̇ ܡܬܝ̣ܗܒ ܗ̱ܘܐ. ܡܛܠ ܕܒܝܬ ܣܦܪܐ ܠܝܬ ܗ̱ܘܐ ܠܗ ܢܝ̣ܫܐ ܠܰܡܚܰܠܦܘ̣ ܬܘܕܝ̣ܬܐ ܘܗܝܡܢܘ̣ܬܐ ܕܐ̱ܢܫ ܣܟ ܣܟܝ̈ܢ.

   ܒܝܬ ܣܦܪܐ ܗܢܐ ܡܬܦܠܓ ܗ̱ܘܐ ܠܬܠܬܐ ܦܪ̈ܥܐ. ܫܪܘܝܐ، ܡܨܥܝܐ، ܘܥܠܝܐ. ܘܟܠ ܦܶܪܥܐ ܡܶܬܩܰܝܰܡ ܡ̣ܢ ܬܠܬܐ ܣܕܪ̈ܐ. ܒܝܬ ܣܦܪܐ ܡܶܬܕܰܒܰܪ ܒܫܬܥܣܪ ܩܢܘܼ̈ܢܐ ܕܡܛܟܣܝ̣ܢ ܡܛܠ ܡܕܒܪܢܘ̣ܬܐ ܓܰܘܳܢܝܬܐ.

ܠܫܢ̈ܐ ܕܡܬܬܩܪܝܢ:

ܐ ـ ܣܘܪܝܝܐ

ܒ ـ ܥܪܒܝܐ

ܓ ـ ܬܘܪܟܝܐ

ܕ ـ ܐܢܓܠܝܫܝܐ

   ܬܚܪܙܬܐ ܕܠܬܚܬ ܐܝܬܝܗ̇ ܕܦܪܥܐ ܬܠܝܬܝܐ ܕܣܕܪܐ ܬܪܝܢܐ ܕܗܪ̈ܓܐ ܕܡܬܝܗܒܝܼܢ:

ܐ- ܝܘ̣ܠܦܢܐ ܬܘܕܝܬܢܝܐ: ܟܬܒܐ ܕܙܗܪܗ̈ ܩܘܕܣܝܗ̈.

ܒ- ܣܘ̣ܪܝܝܐ: ܣܘ̣ܪܥܦܐ، ܩܝ̣ܢ̈ܬܐ، ܩܪܝܢܐ ܘܦܘ̣ܫܩܐ. ܐܠܨܝܐ ܗ̱ܘܬ ܓܝܪ ܕܟܠ ܣܘ̣ܪܝܝܐ ܢܐ݂ܠܦ ܠܠܫܢܐ ܣܘ̣ܪܝܝܐ ܡܫܡܠܝܐܝܬ.

ܓ- ܐܢܓܠܝ̣ܫܝܐ: ܣܘ̣ܪܥܦܐ، ܩܪܝܢܐ، ܦܘ̣ܫܩܐ، ܡܡܠ̱ܠܐ، ܣܝܳܡܳܐ ܘܟܬܝ̣ܒܬܐ.

ܕ- ܬܘܪܟܝܐ: ܬܘ̣ܪܨ ܡܡܠ̱ܠܐ، ܩܪܝܢܐ، ܦܘ̣ܫܩܐ ܘܣܝܳܡܳܐ.

ܗ- ܥܪܒܝܐ: ܬܘ̣ܪܨ ܡܡܠ̱ܠܐ، ܩܪܝܢܐ، ܣܝ݀ܡܐ ܘܟܬܝ̣ܒܬܐ.

ܘ- ܚܘ̣ܫܒܢܐ: ܒܘ̣ܚܢܐ ܥܠ ܟܣܝܘ̣ܬܐ ܕܚܘ̣ܫܒܢܐ ܘܫܘ̣ܪܝ ܐܪܕܝ̣ܟܠܘ̣ܬܐ.

ܙ- ܝܘ̣ܠ̈ܦܢܐ ܟܝܢ̈ܝܐ: ܦܝ̣ܠܝ̣ܣܘ̣ܦܘ̣ܬܐ ܟܝ݀ܢܳܝܬܐ ܘܫܘ̣ܪܝ ܟܝ̣ܡܝܰܐ، ܦܘ̣ܫܩܐ ܘܦܝܙܝܘܠܘܔܝ.

ܚ- ܢܛܘ̣ܪܘ̣ܬ ܚܘ̣ܠܡܢܐ: ܝܘ̣ܠܦܢܐ ܥܠ ܚܘ̣ܠܡܢܐ ܘܝܕܥܬܐ ܕܥܠ ܟܐܒ̈ܐ.

ܛ- ܔܘܓ݂ܪܦܝܐ: ܫܘ̣ܪܝ ܨܘܪܬ ܐܪܥܐ ܘܝܕܥܬܐ ܓܘܢܝܬܐ ܥܠܝܗ̇.

ܝ- ܡܟܬܒܙܒܢܐ: ܩܦܝ̣ܣܐ ܕܡܟܬܒܙܒܢܐ ܓܰܘܳܢܝܐ.

   ܒܝܬ ܣܦܪܐ ܗܢܐ ܒܟܠ ܫܢ̱ܬܐ ܝܪܚܐ ܘܰܦܠܶܓ ܠܚܘܕ ܡܣܬܟܪ ܗ̱ܘܐ. ܟܕ ܡܫ̇ܪܐ ܚܕ ܒܬܡܘ̣ܙ ܘܫ݀ܠܡ ܚܡܫܥܣܪ ܒܐܒ ܝܪܚܐ. ܡܬܥܒܕ ܗ̱ܘܐ ܬܪܝܢ ܒܘܚܪ̈ܢܐ ܓܘ̈ܢܝܐ ܒܫܢ̱ܬܐ ܠܟܠܗܘܢ ܝܠ̈ܘ̣ܦܐ. ܩܕܡܝܐ܆ ܒܦܠܓܘ̣ܬ ܕܰܘܪܳܐ ܩܕܡܝܐ ܕܫܢ̱ܬܐ ܘܬܪܝܢܐ ܕܝܢ ܒܚܪܬ ܫܢ̱ܬܐ ܡܬܥܒܕ ܗ̱ܘܐ. ܦܘܼ̈ܚܡܐ ܕܗܪ̈ܓܐ ܠܦܘ̣ܬ ܡܟܫܪܢܘܬܐ ܕܝܠ̈ܘ̣ܦܐ ܒܗܪ̈ܓܐ ܝܘܡܐܝܬ ܡܬܟܢܫܝܢ ܘܡܶܬܚܰܝܕܝܢ ܘܡܬܟܢܫܝܢ ܦܘܼ̈ܚܡܐ ܓܘ̈ܢܝܐ ܕܒܘ̣ܚܪ̈ܢܐ ܘܡܬܩܪܒܝ̣ܢ ܠܡܘܬܒܐ ܝܘ̣ܠܦܢܝܐ ܕܡܕܒܪܢܘ̣ܬܐ ܕܒܝܬ ܣܦܪܐ. ܘܗ̣ܢܘܢ ܠܦܘ̣ܬ ܦܘܼ̈ܚܡܐ ܕܝܠ̈ܘ̣ܦܐ ܝ݀ܗܒܝ̣ܢ ܠܗܘܢ ܘܪ̈ܩܐ ܕܫܘ̣ܪܪܐ (ܩܰܪܢܰܐ) ܘܠܐܝܠܝܢ ܕܰܡܫܠܡܝ̣ܢ ܠܒܝܬ ܣܦܪܐ ܝ݀ܗܒܝ̣ܢ ܠܗܘܢ ܣܗܕܘ̣ܬܐ ܡܫܪܪܬܐ ܕܒܝܬ ܣܦܪܐ.

ܓܘ̣ܫܡܐ ܝܘ̣ܠܦܢܝܐ ܕܒܝܬ ܣܦܪܐ.

ܐ- ܚܲܒܝ̣ܒ ܦܗܡܝ̣ ܓܘ̣ܠܐ܆ ܫܰܠܡ ܒܝܬ ܣܦܪܐ ܕܡܠܦ̈ܢܐ ܒܐܡܝܕ. ܡܕܒܪܢܐ ܕܒܝܬ ܣܦܪܐ. ܘܡܠܦܢܐ ܕܐܢܓܠܝ̣ܫܝܐ، ܬܘܪܟܝܐ، ܚܘ̣ܫܒܢܐ، ܝܘ̣ܠ̈ܦܢܐ ܟܝܢ̈ܝܐ، ܝ̣ܕܥܬܐ ܥܠ ܢܛܘ̣ܪܘ̣ܬ ܚܘ̣ܠܡܢܐ، ܔܘܓܪܦܝܐ ܘܡܟܬܒܙܒܢܐ.

ܒ- ܝܥܩܘܒ ܐܕܝܒ ܡܘܪܕ܆ ܡܠܦܢܐ ܕܠܫܢܐ ܣܘܪܝܝܐ ܘܩܝܢ̈ܬܐ ܕܥܕܬܐ.

ܓ- ܥܒܕܐܠܐܚܕ ܥܰܘܢܶܐ ܥܪܘܣܗ܆ ܫ̇ܠܡ ܒܝܬ ܣܦܪܐ ܕܣܘ̣ܪ̈ܝܝܐ ܒܡܪܕܝܢ. ܡܠܦܢܐ ܕܣܘܪܝܝܐ، ܥܪܒܝܐ ܘܬܘܪܟܝܐ، ܘܩܝ̣ܢ̈ܬܐ ܕܥܕܬܐ ܘܝܘ̣ܠܦܢܐ ܬܘܕܝ̣ܬܢܝܐ.

ܕ- ܐܠܝܐܣ ܣܶܕܩܺܝ ܡܰܐܔܘ܆ ܡܥܕܪܢܐ ܕܡܠ̈ܦܢܐ ܕܐܢܓܠܝ̣ܫܝܐ ܘܚܘ̣ܫܒܢܐ. ܘܡܠܦܢܐ ܐܦ ܕܥܪܒܝܐ، ܔܘܓܪܦܝܐ، ܣܝ݀ܡܐ، ܘܕܰܐܡܢܐ ܕܣܪܘ̣ܛܘ̣ܬܐ ܐܘ̇ ܟܬܝ̣ܒܬ ܐܝܕܐ.

ܘܡܠ̈ܦܢܐ ܕܦܪܥܐ ܩܕܡܝܐ ܦܪܝ̣ܫܝ̣ܢ ܡ̣ܢ ܗܠܝܢ.[3] 

  ܟܘܪܝܐ ܓܒܪܐܝܠ ܐܩܝܘܙ