ܐܒܘܢ ܩܫܝܫܐ ܝܥܩܘܒ (ܓܰܠܐ) ܓܘܢܰܝ ܝܼܠܝܼܕ ܗ̱ܘܐ ܫܢܰܬ 1919 ܒܩܘܪܝܬ ܟܦܪܙܐ ܕܛܘܪܥܒܕܝܢ ܡܼܢ ܐܒܗ̈ܐ ܥܝܣܐ ܘܣܰܪܐ. ܘܟܕ ܡܛܐ ܠܩܘܡܬܐ ܕܬܪܒܝܬܐ ܘܝܘܠܦܢܐ ܐܬܪܕܝ ܥܕܬܢܐܝܬ ܘܠܫܢܐܝܬ ܒܡܕܪܫܬܐ ܕܡܪܝ ܥܙܙܐܝܠ ܕܩܪܝܬܗ ܥܠ ܐܝܕ̈ܝ ܡܠܦܢܐ ܓܘܪܓܝܣ ܬܰܡܰܪܙܳܝܐ. ܘܒܬܪ ܬܫܡܫܬܐ ܒܥܕܬܐ ܕܩܪܝܬܗ ܘܡܠܦܢܘܬܐ ܒܩܪܝܬܐ ܕܚܐܚ ܘܥܘܡܪܐ ܕܡܪܝ ܓܒܪܐܝܠ܆ ܒܫܢܬ 1953 ܐܬܬܣܪܚ ܟܗܢܐ ܠܥܕܬܐ ܕܡܪܝ ܝܥܩܘܒ ܕܒܢܝܒܝܠ ܩܪܝܬܐ ܒܣܝܡ ܐܝܕܐ ܕܬܠܝ̈ܬܝ ܛܘ̈ܒܐ ܡܪܝ ܦܝܠܘܟܣܝܢܘܣ ܝܘܚܢܢ ܕܘܠܒܢܝ ܚܣܶܐ ܕܘܟܪܢܐ. ܘܒܩܛܝܪ ܡܼܢ ܛܘܪ̈ܦܐ ܘܫܚܘ̈ܩܝܐ ܐܬܪ̈ܢܝܐ ܡܥܝ̈ܣܢܐ ܘܡܚܫܘ̈ܠܐ ܕܓܠܘܬܐ ܙܩܝܦܬܐ ܥܰܙܝ ܘܚܰܡܣܢ ܒܐܬܪܐ ܕܐܒܗ̈ܬܐ. ܘܫܢܬ 1996 ܐܫܬܟܢ ܠܗ ܨܠܝܒܐ ܩܕܝܫܐ ܒܕܪܡܣܘܩ ܕܣܘܪܝܐ ܡܼܢ ܐܝ̈ܕܝ ܩܕܝܫܘܬܗ ܕܡܪܢ ܡܪܝ ܐܝܓܢܐܛܝܘܣ ܙܟܝ ܩܕܡܝܐ ܕܒܝܬ ܥܝܘܨ ܦܛܪܝܪܟܐ ܕܐܢܛܝܘܟܝܐ ܘܕܟܠܗܿ ܡܕܢܚܐ. ܗܕܐ ܕܝܢ ܐܝܟ ܩܘܠܣܐ ܠܬܫܡܫܬܗ ܪܘܚܢܝܬܐ ܢܓܝܪܬܐ ܘܗܝܡܢܘܬܗ ܘܡܟܝܟܘܬܗ ܕܠܐܦ̈ܝ ܥܕܬܐ. ܘܒܛܢܢܐ ܪܘܚܢܝܐ ܕܠܒܝܫ ܗ̱ܘܐ ܕܠܐ ܩܘܛܥ ܘܡܐܝܢܘ ܫܡܫ ܒܢ̈ܝ ܥܕܬܗ ܥܕܡܐ ܠܢܫܡܬܐ ܐ̱ܚܪܝܬܐ. ܘܒܗ ܐܫܬܰܡܠܝܰܬ ܗܿܝ ܕܐܡܝܼܪܐ: ܛܘܒ ܠܐܝܢܐ ܕܫܰܪܝ ܘܫܰܠܡ. 4 ܐܝܪ 2007 ܕܟܐܢ ܝܘܡ ܥܪܘܒܬܐ ܫܰܢܝ ܘܥܢܕ ܒܣܝܒܘܬܐ ܥܡܝܩܬܐ ܕܪܡܝܰܬܗ ܗ̱ܘܬ ܒܡܢܘܠܘܬܐ ܕܟܐܒ̈ܐ ܘܟܘܪ̈ܗܢܐ. ܘܫܒܩ ܒܬܪܗ ܬܫܡܫܬܐ ܡܩܠܣܬܐ ܘܥܘܗ̈ܕܢܐ ܛܒ̈ܐ ܕܪܥܝܘܬܐ ܡܫܝܼܝܝܝܬܐ. 6 ܐܝܪ 2007 ܝܘܡ ܚܕܒܫܒܐ ܒܬܪ ܛܟܣܐ ܕܥܘܦܝܐ ܕܐܬܬܩܝܡ ܒܪܝܫܢܘܬܐ ܕܚܣܝܘܬܗ ܕܡܪܝ ܦܝܠܘܟܣܝܢܘܣ ܨܠܝܒܐ ܐܙܡܢ ܡܝܛܪܦܘܠܝܛܐ ܡܥܠܝܐ ܕܡܪܥܝܬܢ ܘܛܘܝܒܐ ܕܟܗ̈ܢܐ ܘܥܡܐ ܡܗܝܡܢܐ ܡܼܢ ܡܪܕܐ ܘܡܕܝܕ ܘܫܪܟܐ ܕܩܘܪܝ̈ܐ ܕܛܘܪܥܒܕܝܢ ܐܬܩܒܪ ܘܐܬܬܣܝܡ ܦܓܪܗ ܒܥܕܬܐ ܕܒܢܝܒܝܠ ܩܪܝܬܐ ܕܒܗܿ ܫܡܠܝ ܪܗܛܐ ܕܐܓܘܢܗ ܪܘܚܢܝܐ. ܗܠܝܢ ܐܢܘܢ ܫܡܗ̈ܐ ܕܟܗ̈ܢܐ ܕܐܬܛܝܒܘ ܒܥܘܦܝܐ ܕܡܢܚܐ: ܪܒܢ ܐܒܪܗܡ ܬܘܪܟܪ ܪܝܫܕܝܪܐ ܕܡܪܝ ܗܒܝܠ ܘܡܪܝ ܐܒܪܗܡ ܘܡܪܝ ܗܒܝܠ  ܕܡܕܝܕ ܘܪܒܢ ܡܘܫܐ ܓܘܪܒܘܙ ܪܝܫ ܕܝܪܐ ܕܝܠܕܬ ܐܠܗܐ ܕܚܐܚ ܘܪܒܢ ܕܢܝܐܠ ܨܘܓܝ ܪܝܫܕܝܪܐ ܕܡܪܝ ܝܥܩܘܒ ܚܒܝܫܝܐ ܕܨܠܚ ܘܪܒܢ ܐܣܛܦܢ ܦܝܕܰܢ ܕܕܝܪܐ ܕܟܘܪܟܡܐ ܘܪܒܢ ܓܒܪܐܝܠ ܓܬܝ ܕܥܘܡܪܐ ܕܡܪܝ ܓܒܪܐܝܠ ܘܪܒܢ ܥܙܝܙ ܓܠܝܟ ܕܕܝܪܐ ܕܡܪܝ ܡܠܟܐ ܩܠܘܙܡܝܐ ܘܟܘܪܝܐ ܓܒܪܐܝܠ ܐܩܝܘܙ ܡܟܗܢܢܐ ܕܥܕ̈ܬܐ ܕܡܪܕܐ ܘܩܫܝܫܐ ܡܠܟܐ ܬܩ ܕܡܝܕܘܢ ܩܪܝܬܐ ܘܩܫܝܫܐ ܡܠܟܐ ܓܘܡܘܫܨܝ ܕܟܦܪܙܐ ܩܪܝܬܐ ܘܩܫܝܫܐ ܓܒܪܐܝܠ ܐܩܛܫ ܕܒܩܘܣܝܢܐ ܩܪܝܬܐ ܘܩܫܝܫܐ ܢܥܡܢ ܓܘܢܠ ܕܒܪܠܝܢ ܕܐܠܡܢܝܐ ܘܩܫܝܫܐ ܨܠܝܼܒܐ ܐܪܕܢ ܕܒܝܬܣܒܝܪܝܢܐ ܩܪܝܬܐ ܘܩܫܝܫܐ ܐܝܣܚܩ ܐܪܓܘܢ ܕܥܕ̈ܬܐ ܕܡܕܝܕ ܘܩܫܝܫܐ ܡܘܪܕ ܐܘܙܠ ܕܒܪܠܝܢ ܕܐܠܡܢܝܐ.  

   ܒܕܓܘܢ ܒܪ̈ܓܫܐ ܪ̈ܘܚܢܝܐ ܘܠܒܢ̈ܝܐ ܒܪܡ ܒܒܘ̈ܝܐܐ ܡܫܝ̣ܚ̈ܝܐ ܡܘܕܥܝܢܢ ܫܘܢܝܐ ܕܐܒܐ ܗܢܐ ܠܒܢ̈ܝ ܥܡܐ ܣܘܪܝܝܐ. ܘܡܢܗ ܕܗ̇ܘ ܕܒܢܦ̈ܫܬܢ ܠܣܒܪܐ ܕܩܝܡܬܐ ܫܪܪ܆ ܡܦܝ̣ܣܝܼܢܢ ܡܼܢ ܡܪܝܐ ܕܒܝܕ ܚܝܠܐ ܕܫܟܝ̈ܢܬܐ ܕܩܕܝ̈ܫܐ ܕܛܡܝܪܝܢ ܒܐܬܪܐ ܕܛܘܪܥܒܕܝܢ ܘܫܪܟܐ ܕܐܒܗ̈ܬܐ ܣܘܪ̈ܝܝܐ ܢܢܝ̣ܚܘܗܝ ܒܐܘ̈ܢܐ ܐܘܪ̈ܫܠܡܝܐ ܒܥܕܬܐ ܗܿܝ ܕܒܘܟܪ̈ܐ ܕܒܫܡܝܐ. ܘܢܫܡܥܝܘܗܝ ܗܿܘ ܩܠܐ ܡܚܰܕܝܢܐ ܕܐܡܿܪ «ܐܝܘ ܥܒܕܐ ܛܒܐ ܬܐ ܥܘܼܠ ܘܝܼܪܬ ܚܝ̈ܐ ܕܠܥܠܡ». ܘܢܡܠܐ ܒܠܒܐ ܕܒܢ̈ܝ ܡܪܥܝܬܗ ܘܟܠܗܘܢ ܗܕܡ̈ܝ ܝܩܪܬܗ ܕܡܢܚܐ.                  

       ܕܝܪܐ ܕܟܘܪܟܡܐ - ܛܘܪܥܒܕܝܢ: 4 ܐܝܪ 2007

ܩܠܝܬܐ ܕܚܣܝܘܼܬܐ ܕܡܪܕܐ ܘܐܡܝܕ ܕܣܘܪ̈ܝܝܐ